Taitra maraina ny fokonolona teny Anosisoa Ambohimanarina, omaly. Nipoaka tokony ho tamin’ny 07 ora teo ny vata mpanova herinaratra “transformateur” an’i Jirama miisa roa. Vokany, nipoaka mafy izany sady nahazo ny tsenakely iray mpanao “photocopie” teny an-toerana. May tanteraka izany, ka tsy nisy noraisina intsony. Levon’ ny afo tamin’izay koa ireo entana maro isan-karazany nihidy tao anatiny toy ny solosaina, “imprimante”, “vitrine” ary entana fanaovana “gargotte”. Tapaka tanteraka ny jiro sy rano teny an-toerana. Tonga teny ireo tompon’andraikitry ny jirama nanapaka ny herinaratra. Nanampy namono afo kosa ireo sampana mpamonjy voina avy etsy Anosivavaka. “ Nisy rano ilay transfo ka nipoaka mafy ka nahazo ireo tariby mpitondra herinaratra. Avy eo nahazo ilay tsenakely ny afo ka nirehitra ihany koa izany”, hoy ny fanazavan’ireo nanatri-maso. Notohizany fa tsy voasokatra ilay tsena. Ny tompony rahateo, hoy izy, tsy teo an-toerana fa mbola an-dalana namonjy izany tamin’ny fotoana nisehoan’ny loza. “Transformateur” roa mifameno ireto may ireto ary efa indroa nipoaka. Voalohany tamin’izany tsy mbola nisy afo saingy nitera-doza ity faharoa ity. Nanome toky ny teknisianin’ny jirama tonga nandray ny raharaha fa ho vita aloha ny asa rehetra.
Henintsoa H.
French