Ny 15 novambra 2022 no nisokatra ny fotoam-panondranana lavanila ary tsy hitsahatra izany raha tsy ny faran’ ny volana mey 2023. Natomboka ny dinika fitadiavam-bahaolana eo amin’ny fihariana lavanila manoloana ny olana misy sy ny fitarainana. Noho izany, nanokatra fiaraha-midinika tamin’ireo mpandraharaha mpanondrana lavanila ny minisitera misahana ny Varotra. Dingana voalohany no vita tamin’ny 6 febroary 2023, teto Antananarivo.
Nihaino ny hetaheta sy ny olan’ireo mpandraharaha ny minisitra Razafindravahy Edgard.
Tohizana avy hatrany amin’ny fivorian’ny eo anivon’ny komitim-pirenena momba ny lavanila izany (CNV) ary hifampiresahana amin’ny governemanta hirosoana amin’ny vahaolana. Hiverina hihaona indray ny ministera sy ireo mpandraharaha mpanondrana amin’ny 15 febroary ho avy izao.
Ny zava-misy ankehitriny eo amin’ity fihariana ity dia mbola betsaka ny lavanila any amin’ireo tantsaha sy mpanangom-bokatra hiandrasana mpividy. Mikorontana tanteraka ny varotra lavanila, maitso na masaka, any ifotony, tsy araka ny nameran’ny fanjakana azy. Jerena haingana ny fomba handaminana izany miaraka amin’ireo mpandraharaha mpanondrana lavanila ireo. Torak’izany koa ny fifampiresahana amin’ireo mpividy iraisam-pirenena.
«Tsy maintsy natao ity fifanakalozana ity satria ilaina ny miaro ireo mpisehatra voakasiky ny rojom-pihariana eo amin’ny lavanila mba tsy hisian’ny fatiantoka», hoy ny minisitra Razafindravahy Edgard , nanoloana ireo mpanondrana tonga teny amin’ny Novotel Alarobia.
Ndrina
French