Tontosa ny atrikefa bagasy. Hiroso amin’ny zara sehatra indray ry zareo ao amin’ny Sehatra Bagasy. Hiavaka ny amin’ity volana febroary ity satria ao anatin’ ny «Asaramanitra bagasy» no hanatontosana izany, ny tolakandron’ny asabotsy 11 febroary izao ao amin’ny efitrano malalaky ny Aro Antsahavola. Nanatanteraka antso ho an’ny tarika, mpanakanto mandeha irery, olon-tsotra mihira bagasy, mpitia bagasy hanolotra hira roa voaomana amin’io fotoana io. Nanentana ihany koa izy ireo : «ny vehivavy hiakanjo lava. Samy hisampina lamba kosa ny lehilahy sy ny vehivavy». Hisy tononkira fifampiarahabana izay ahitana ny sanganasan-dRanaivo Ranarivelo, Naka Rabemanantsoa, Justin Rajoro, Andrianary Ratianarivo.
Tafiditra ao anatin’ny fifampiarahabana nahatratra ny taona 2023, eo anivon’ny Sehatra Bagasy ity «Asaramanitra bagasy» ity. Noho izany, «tsy misy ny vidim-pidirana fa samy mivimbina tsakitsaky sy rano fisotra tsy misy alikaola ny tsirairay», hoy ny tompon’andraikitra.
HaRy Razafindrakoto
French