Mpivarotra hani-masaka miisa 40 teto Antananarivo nahazo mari-pankasitrahana avy amin’ny INTH (Ivon-toeram-pampianarana misahana ny fizahantany sy hotely) omaly. Mpivarotra teo anivon’ny tsenan’ny Mahamasina, Soamanatombo ary Zemaika izy ireo. Niompana amin’ny « securité alimentaire » ny fiofanana nomena azy ireo hoy ny tompon’andraikitra. Nojerena manokana ny fomba atao mba hialana amin’ny ahiahin’ny mpanjifa manoloana ny habetsaky ny sakafo tsy ara-pahasalamana eny anivon’ ny tsena eny. Tanjona ny hampidirana ny sakafo ara-pahasalamana eny anivon’ ny tsena mpivarotra hani-masaka eto Antanananarivo. « Hampidirana ny tsena sy ny fivarotana sakafo hani-masaka ho eo amin’ny sehatry ny matihanina izay tafiditra ao anatin’ny veliranon’Iarivo » hoy ny tompon’ andraikitra eo anivon’ny kaominina Antananarivo, Razafimanahaka Naivo.
Ara-pahasalamana
Nilaza ny tompon’andraikitra fa efa azo itokisana tsara ireo mpivarotra nisitraka fampiofanana ireo. “Hirariana ny tsy hisian’ny olona marary ateraky ny fihinana sakafo eny an-tsena” hoy hatrany izy. “Mba tsy hisy intsony ny baranahany eny anivon’ny tsena sy eny amoron-dalana rehetra eny” hoy hatrany ny fanazavana.
Tsy mijanona eo amin’ ny fampiofanana ihany ny tetikasa fa tsy maintsy misy ny fanaraha-maso ataon’ny eo anivon’ny kaominina Antanananarivo aorian’ny hetsika. Voakasik’izany ny fahadiovan’ny sakafo. Takiana amin’ireo mpivarotra ihany koa ny fahaizana mandray olona. Mba ho reharehan’i Madagasikara sy ny tanan’Antananarivo hoy hatrany ny fanazavana.
Marihina fa nampiofana azy ireo ny teo anivon’ny INTH sy ny sampana mpamonjy voina. Andiany voalohany ary mbola hitohy hatrany kosa ny tetikasa hoy ny tale eo anivon’ny Fhrom Rakotondrainibe Tsiory. Mahatratra 130 ireo mpivarotra ho kendrena hisitraka ny tetikasa.
Mino
(mpianatra asa)
French