Hanainga rahampitso ny ekipan’ny GNVB (Gendarmerie Nationale de Volley-Ball), hiatrika ny andiany faha-27 ny fiadiana ny amboaran’ny tarika tompondaka aty amin’ny faritra faha-7. Vonona tanteraka ireo mpilalao, raha ny nambaran’ny filohan’ny klioba, Chef d’Escadron, Commandant Fortunat, tetsy Ankorondrano, omaly.
Mpilalao 12 eo amin’ny lehilahy ary 9 kosa ny vehivavy, miampy ireo mpitarika ny mandrafitra ny delegasion’ny GNVB hihazo an’i Maorisy. Fifaninanana hanomboka amin’ny 25 febroary izao. « Afaka mampijoro ireo zandriny hanampy ny zokiny amin’ity fifaninanana ity ny GNVB ka azo antoka fa handrafitra ny ekipam-pirenena ny akamaroan’izy ireo », hoy ny fanazavan’ity filohan’ny GNVB ity.
Tombony ihany koa ny nahafahana nanao fanazarantena tao anaty efitrano. « Nanao ny ezaka rehetra isika, ka raha ny fijery mahitsy dia hitondra amboara na ny lehilahy na ny ekipa vehivavy », hoy hatrany ny Chef d’Escadron, Commandant Fortunat. Nanamafy izany ny Tale tekinika nasionaly, Razafinjatovo Jean Honoré.
Efa nanomboka tamin’ny oktobra ny fanomanana, hoy izy, niato kely tamin’ny fetin’ny krismasy sy ny taom-baovao ary niverina indray tamin’ny 5 janoary hatramin’izao. Ity Tale teknika nasionaly ity no notendren’ny GNVB hanazatra ny klioba amin’ity. « Voninahim-pirenena no arovana, ny lehibe no manendry ny tena hoe mitondra ny klioba amin’ity andiany faha-27 ity, asa anatin’ny zandarmaria tsy azo lavina », hoy ny nambarany.
Mi.Raz
French