Taorian’ny fanomezan-dalana avy amin’ny filohan’ ny Repoblika, amin’ny fahafahana mampiasa ny kianja basikety Mahamasina, nihaona tamin’ny Sekreteram-panjakana misahana ny Tanàna Vaovao, ny federasiona malagasin’ny basikety. Niara-nandinika ny fomba hitantanan’ny FMBB ity kianja ity ny SENVH, Andriamanohisoa Gérard sy ny filohan’ny Federasiona, Ramaroson Jean Michel. Nidina ifotony avy hatrany ny roa tonta nijery ny fotodrafitrasa teny an-toerana, taorian’ ny dinika natao. Tsiahivina, fampiasana tsy misy fepetra ny kianja basikety Mahamasina ny alalana azon’ny Federasiona malagasin’ny basikety. Hampiasa avy hatrany ny kianja amin’ny lalao rehetra, araka izany, ny fandaharam-potoana, ka izany indrindra no antony nihaonana tamin’ity departemanta miandraikitra ny kianja Barea Mahamasina ity. Ankoatra ny fifaninanana nasionaly, laharam-pahamehana ny fampiasana ny kianja, ho fanomanana ny lalao iraisam-pirenena goavana miandry ny ekipa malagasy, toy ny fiadiana ny amboara eran-tany, fiadiana ny tompondaka an’i Afrika, ny “Jeux de la Francophonie” ary ny lalaon’ ny Nosy andiany faha-11.
Mi.Raz
French