Anisan’ireo mpitendry gitara misongadina amin’ny jazz i Joel Rabesolo. Tsy mitsahatra ny mikaroka ny mozika ankapobeny, indrindra ny tendry gitara maka faka Malagasy izy.
Nisongadina izy tany amin’ny taranja basikety… Fa mbola nisongadina kokoa i Joel Rabesolo taty amin’ny mozika, indrindra ny fitendrena gitara. Nampiavaka azy hatramin’ny fahakeliny ny fifehezany ity zavamaneno ity, amin’ny fitendry ankavia. Elaela no tsy tazana sy tsy hita an-tsehatra teto an-tanindrazana i Besl. Noho ny nanaovany fikarohana sy nanohizany fianarana tany amin’ny Conservatoire Royal any Bruxelles no antony.
“Taorian’ny fikarohana sy fianarana maharitra tao amin’ny Conservatoire Royal any Bruxelles, nahazo ny diplaoma “Master en guitare jazz aho”, hoy ny fanambaran’ ity kintan’ny tendry gitara ity. Niompana tamin’ny fitendrena marovany ny lohahevitry ny fikarohana nataony, izay nanaovany fanohanana ny talata lasa teo. « Langage Marovanistique : en quoi son influence représente-t-elle une esthétique musicale chez les guitaristes malgaches ? » Ny lohahevitra nofakafakain’i Joël Rabesolo nandritra izany.
« Maneho ny fankasitrahana ireo razana sy ireo nilalao ny marovany manerana ny Nosy aho. Nahafaly ahy ny mizara ny lafiny teknika tamin’ny fikarohana nataoko, izay nanomezana vahana ny fahasamihafan’ny kolontsaina, amin’ny maha mpitendry gitara”, hoy ny nambaran’i Joel Rabesolo. Maromaro ireo anatin’ny tontolon’ny mozika no nisaoran’ity mpitendry gitara ity, noho ny fanampiana nahatongavany amin’izao. Anisan’ireny ry Masy, mpitendry marovany. Ireo mpitendry gitara kalaza toa an-dry Fataka, Teta, Chrisantho, D’Gary, Hajazz, Solorazaf, Rôla Gamana, sns. Eo ihany koa ireo mpanakanto nanao fikarohana sy namoaka boky toa an’i Jenny Fuhr, Mireille Mialy Rakotomalala, Julien Lallet ary Victor Randrianary.
Ankoatra izay, fantatra fa eo am-panomanana ny fivoahan’ny rakikirany i Joel Rabesolo. Mazava loatra fa hisy fofony amin’ny fikarohana nataony izany.
Zo ny Aina
French