Nanararaotra ny fandalovan’ny rivodoza, jiolahy iray maty voatifitra ary efa-dahy voasambotry ny polisy teo am-pamakiana «quincaillerie», tao Ampasambazaha- Fianarantsoa, ny alin’ny talata hifoha ny alarobia teo. Nifanehatra tampoka tamin’ny polisy manao fisafoana amin’ny alina ireto jiolahy mitam-piadiana, nikiry handositra avy hatrany ireto farany. Nasain’ny polisy nijanona saingy nanohy ny fitsoahana ihany. Raikitra ny fifandonana. Vokany, lavo ny iray tamin’ireo jiolahy. Voasambotra ny efatra namany.
Namaky fiangonana
Ankoatra ireo efa-dahy voasambotra sy ilay iray voatifitra, tra-tehaka koa ny iray tamin’ireo jiolahy namaky fiangonana tao Ambatomena. Efa nigadra any am-ponja ireo roa lahy naman’ity jiolahy sarona ity. Raha tsiahivina, nobatain’ny jiolahy telo lahy ny zavamaneno tao am-piangonana ny alin’ny 13 janoary teo. Taorian’ny fanadihadian’ny polisy, noraisim-potsiny ny atidoha nikotrika sy ny namany iray hafa namaky ilay fiangonana ny faran’ny volana janoary teo.
Tsiferana R.
French