Nanainga omaly nihazo an’Anosiala, distrikan’Ambohidratrimo ny fiarabe maromaro hitondra tolotra ara-pahasalamana maimaim-poana manatona vahoaka « Sarobidy ny aiko ». Miavaka ny tolotra satria mitovy amin’ny omen’ny hopitaly lehibe, miaraka amin’ny fitaovana avo lenta sy mpitsabo manam-pahaizana manokana, hoy ny minisitry ny Fahasalamam-bahoaka, teny am-piaingana.
Hisitraka ny hetsika sosialy avokoa ny distrikan’Avaradrano, Atsimondrano, Ambohidratrimo ary ny boriborintany enina miaraka amin’ny fikambanana Fitia. Rehefa misy diabe ho an’ny fahasalamana, miara-miasa hatrany ny roa tonta. An-jantony ny mpiasan’ny fahasalamana handray an-tanana ireo vahoaka amin’ireo toerana rehetra handalovana. Eny Ilafy no hivantana ny hetsika anio, hitohy any Antaninkatsaka, rahampitso.
Hahazo ny anjarany avokoa ny boriboritany enina. Hofaranana eny Mahamasina manoloana ny kianjan’i Barea ny tolotra, ny 8 marsa. Sampam-pitsaboana maro no voakarakara, fanararaotana ho an’ireo tsy afaka manatanteraka izany amin’ny andavanandro noho ny olana amin’ny vola.
Vonjy A.
French