Maromaro ny toerana notsidihin’ny delegasiona malagasy tarihin’ny filohan’ny Antenimierandoholona (PS), Razafimahefa Herimanana, atsy amin’ny Nosy La Réunion, hikarohana fiaraha-miasa.
Notsidihina ny foibe frantsay iraisam-pirenena mikasika ny fampianarana, fanofanana ny olom-boafidy, ny mpianatra, ny mpiasa ambony, ny fitantanan-draharaha, ny tanora mpiasa, sns. Eo koa, ny Conservatoire botanique de Mascarin (CBN), misahana ny tontolo mananaina sy ny tontolo iainana. Manampy izany ny foibe fitiliana avy amin’ny zanabolana, hikirakirana ny sary mikasika ny fanajariana ny tany, ny fikirakirana ny antontam-baovao mikasika ny fambolena, ny fiarovana ny tontolo iainana, sns.
Hisy koa ny fiaraha-miasa miaraka amin’ny tobim-pitsaboana Clinifutur, manampahaizana amin’ny « dyalise ». Ho an’ny tanora, notsidihina ny Le Village CA, mampivondrona ny tanora Star-up, tohanan’ny banky misahana ny fambolena.
50.000 euros ho an’ny traboina
Nisy koa ny fihaonana tamin’i Eric Ferrere, filoha lefitry ny filankevitry ny departemanta La Réunion, misahana ny asa vaventy sy ny fanomezan-danja ny vakoka ny tenany, ny 23 febroary teo. Nohararaotin’ny filoha lefitra, E. Ferrere tamin’ity fotoana ity ny fiaraha-mioriny amin’ireo fiankavian’ny niharam-boina namoy aina tamin’ny rivodoza Freddy, sady fanohanany ny vahoaka malagasy. Nanolotra lelavola 50.000 euros i La Réunion, araka izany. Nisaotra izany ny filohan’ny Antenimierandoholona tamin’ ny anaran’ny filoham-pirenena sy ny governemanta ary ny vahoaka malagasy.
Njaka A.
French