Nirefodrefotra indray ny basy nandritra ny fifandonana teo amin’ny dahalo sy ny miaramila ZDS Ikopa, tao Ankazobe, afakomaly. Maty rotiky ny bala ny dahalo telo lahy nandritra ny fifandonana. Araka ny fampitam-baovao voaray, nandritra ny fisafoana fanao mahazatra nataon’ireo miaramila no nahatrarana ireto dahalo ireto. Mitohy hatrany ny ezaka ataon’ny miaramila amin’ny fampandrian-tany amin’iny faritra Ankazobe iny mba ho fitandroana ny fandriampahalemana. Maro ireo olona mikaikaika sy nametraka fitarainana tany amin’ny mpitandro filaminana amin’ny hafitsoky ny asan-dahalo. Manoloana izany, nandray fepetra mifanaraka amin’izany ny miaramila tamin’ny alalan’ny fametrahana paikady manokana ahafahana mamongotra ireo malaso. Nahitam-bokany izany satria dahalo raindahiny telo no indray voasambotra tamin’io fotoana io. Nanao fisafoana tao amin’ny tsena ny miaramila ka nifanehatra tamin’ireo dahalo. Nandritra ny fanadihadiana savaranonando no nilazan’ireto malaso ireto ny fisian’ny fitaovam-piadiana any am-pelatanan’ny namany. Tamin’ny fotoana nakana izany fitaovam-piadiana izany no nisian’ny fifandonana ka nitarika ny fahafatesan’ireo dahalo telo lahy.
Jean Claude
French