Naneho ny fahavononany hanohana an’i Madagasikara amin’ny alalan’ny fiaraha-miasa ara-tafika ny firenena frantsay. Hisy, araka izany, ny fanazarantena iraisan’ny Tafika malagasy sy frantsay…
“Mitohy hatrany ny fiaraha-miasa efa nisy hatramin’izay teo amin’i Madagasikara sy Frantsa izay niato noho ny fisian’ny valan’aretina Covid-19. Zava-dehibe ny fanamafisana ny fitohizan’ny fiaraha-miasa ara-tafika izay efa mafy orina hatramin’izay”, hoy ny minisitry ny Fiarovam-pirenena (MDN), ny Jly Rakotoarijaona Josoa, raha nandray ny masoivoho frantsay miasa sy monina eto Madagasikara, Arnaud Guillois sy ny tompon’andraikitry ny Fiarovana eo anivon’ity masoivoho ity, ny Kly Sébastien Dupety, teny Ampahibe izy, omaly. Naneho ny fahavononany hanohy sy hampivelatra izany miaraka amin’ny firenena frantsay koa ny MDN mba hahazoana vokatra tsara hatrany eny an-kianja. Niarahaba manokana ny MDN sy nirary soa azy amin’izao andraikitra napetraky ny filohan’ny Repoblika aminy izao ny masoivoho frantsay. Naneho ny hafaliany izy amin’ny fandraisana mahafinaritra natao azy. “Tsapa ny fahavononan’ny roa tonta hifanome tanana sy hiara-hiasa akaiky hatrany”, hoy Arnaud Guillois. Ho fanohizana izany fiaraha-miasa ara-tafika izany, misy ny fikarakarana fanazarantena iraisan’ireo Tafika avy aty amin’ny faritry ny Ranomasimbe Indianina ahitana ny fandraisan’anjara ny Tafika malagasy sy ny “Forces armées de la zone sud de l’Océan Indien” na FAZOI. Ankoatra izany, mandray ny delegasiona frantsay avy amin’ny minisiteran’i Eoropa sy ny Raharaham-bahiny ny eo anivon’ny BANA Antsiranana amin’izao fotoana izao, hanatanterahana ny tetikasa fanatsarana ny tobim-pamaharana ao Antsiranana hahafahan’ireo karazan-tsambo rehetra miandriaka amin’ny fari-dranomasin’i Madagasikara miantsona ao.
Jean Claude
French