Nidina avy hatrany tany Fianarantsoa ny minisitry ny Tanora sy ny fanatanjahantena, Andre Haja Resampa, vantany vao naheno ny lozam-pifamoivoizana nahazo ireo tanora avy amin’ny fitaleavam-paritra Matsiatra Ambony. Niray fo tamin’ny fianakavian’ny namoy ny ainy izy ary nankahery ireo naratra miisa 19 mianadahy, teny amin’ny hopitaly CHU Tambohobe Fianarantsoa. Tamin’ ny alalan’ity minisitra ity sy ny minisitry ny Tontolo iainana, no nanoloran’ny fitondram-panjakana tohana ho an’ny tanora niharam-boina rehetra sy ny famangiana ho an’ny fianakaviana mana-manjo.
Marihana fa noraisin’ny fitondram-panjakana an-tanana tanteraka, tamin’ny alalan’ny minisiteran’ny Fahasalamana ny saran’ny fitiliana sy ny fitsaboana rehetra. Tsy hadinon’ ny minisitra, Andre Haja Resampa, ny nisaotra ny solombavambahoaka, ny governora, ny préfet, ireo ben’ny Tanàna sy ny fitaleavam-paritra, izay niara-nientana tamin’ ny fikarakarana rehetra raha vao nitranga ny loza ka mandrak’androany,.
Tsiahivina, tanora avy namboly hazo tao Andriana, ireto tra-doza teo amin’ny RN7, teo Andohasahamarina, kaominina Talatan’Ampano, distrikan’i Vohibato ireto, ny 4 marsa lasa teo. Iray ny namoy ny ainy ary 19 no naratra. Efa nahazo ny fitsaboana sahaza azy avokoa ireo naratra rehetra, raha ny angom-baovao voaray farany.
Mi.Raz
French