Lavon’ny balan’ny polisin’ny FIP tao amin’ny cité Canada Toamasina, afakomaly hariva, ny jiolahy iray isan’ireo tompon’antoka tamin’ny fanafihana namoizana ain’ olona tao an-toerana. Nitrangana fanafihana mitam-piadiana nahafatesana teratany vahiny iray tao Toamasina, ny faran’ny herinandro teo. Niroso tamin’ny fanadihadiana sy ny angom-baovao avy hatrany ny polisy ka fantatra fa mihaodihaody eo amoron-dranomasina Canada Toamasina ny iray amin’ireo jiolahy. Nametraka vela-pandrika hahafahana misambotra ireo jiolahy ny polisy. Voamarina tokoa ny fisian’ity jiolahy ity teo amoron-dranomasina. Vao nahita ireo polisy anefa izy, nanohitra tamin’ny antsibe avy hatrany. Nanohitra hatrany izy ka voatery nitifitra azy ny polisy. Vokany, lavon’ny balan’ny polisy ity jiolahy raindahiny ity. Tao anatin’ny fanadihadiana no nahafantarana fa jiolahy efa mpamerin-keloka izy. Vao nivoaka ny fonjan’Ambalatavoahangy kanefa niverina nanohy ny asa ratsiny indray. Mitohy, araka izany, ny fikarohana ataon’ny polisy ny naman’ity jiolahy ity.
Jean Claude
French