Raha ny fandalinana nataon’ireo manam-pahaizana ao amin’ny Organisation météorologique mondiale (OMM) dia anisan’ny rivodoza naharitra indrindra ary ela vao levona ilay rivodoza Freddy nanafika an’i Madagasikara nisesy teo.
Anisan’ny rivodoza nahafaty olona betsaka ary nanimba zavatra maro ihany koa i Freddy. Nampitondra takaitra firenena maromaro ihany koa izy ary anisan’izany i Madagasikara sy Mozambika izay ravarava sy dibo-drano ny faritra sasantsasany.
Tsy mbola afa-bela amin’ny orambe sy ny rivotra entiny ny ao Mozambika ary manambana hiverina any indray izy amin’ny faran’ny herinandro.
Naharitra amam-bolana ny fahaveloman’i Freddy (35 andro). Niala tany amin’ny morontsiraka avaratra andrefan’i Aostralia no niforonany ary nitety ny ranomasimbe Indianina ka izao tamana ao amin’ny lakandranon’i Mozambika izao.
Ho an’ny teto Madagasikara, ny tao amin’ny faritra Atsimo Andrefana no tena lasibatra ary tanàna maro no fefiky ny rano tamin’ny fiverenany teo.
Tatiana A
French