Tonga teny amin’ny birao mahaleo tena iadiana amin’ny kolikoly (Bianco) Ambohibao, omaly, ireo olom-boatendry manatanteraka ny asam-panjakana ao amin’ny minisiteran’ny Mponina sy ny fiahiana sosialy ary ny fampivoarana ny vehivavy.
Anisan’ny andraikitra mila ataon’ireo olom-boatendry mitana andraikitra ambony ny fanambaram-pananana mba hisian’ny mangarahara amin’ ny asam-panjakana.
Nanao izany fanambaram-pananana izany, teny amin’ny Bianco, ireo tompon’andraikitra voakasik’izany, omaly.
Nanamafy ny tale jeneralin’ny Bianco fa tsy hananan-kavana ny ady ary fahavalon’ ny Malagasy izay manao kolikoly ka izay indrindra no ampirisihana ireo tomponandraikitra ambony ny amin’ny fanambaram-pananana.
Nisolo tena ny minisitra Soafilira Princia, izay manatanteraka iraka any Atsimo, ireo tale jeneraly 3 mianadahy eo anivon’ny minisiteran’ny Mponina, notarihin’ny talen’ ny fiahiana ara-tsosialy.
Tanjona amin’ny fanaovana fanambaram-panana ny fampangaraharana ny fahazoana harena ao anatin’ny fanatanterahana ny asa, mila mifanaraka amin’ny tombontsoa sy ny karama mifanaraka amin’ny asa atao.
Porofo izao finiavana izao fa vonona hiala amin’ny fakam-panahy mety handavo eo am-panatanterahana ny asam-panjakana ny olom-boatendry ao amin’ity minisitera ity.
Manentana hatrany ny mpiara-miasa ny tale jeneralin’ny fiahiana sosialy, Rivomanana Ghisbert, hanao izany fanambaram-panana izany ao anatin’ny faharesen-dahatra sy ny fenitra mifehy ny asam-panjakana. Anisan’ny sehatra iray iadiana amin’ny kolikoly rahateo ny fanaovana fanambaram-panana, raha ny fanazavan’ny tomponandraikitra ao amin’ny Bianco.
Anisan’ny minisitera mikirakira vola mivantana ny minisiteran’ny Mponina ka mila fitandremana. Rariny ny hisian’ny fihetsika fakan-tahaka toy izao hampisy fitokisana sy mangarahara amin’ ny fomba fiasa.
Tetsy andaniny, nilaza ihany koa ny tale jeneralin’ny fiahiana sosialy, ny vinavina hanangana ny vaomiera manokana hikirakira ny fitarainana anatiny ao amin’ny minisitera. Ahafahana midinika miaraka amin’ny Bianco ny fepetra raisina amin’ny trangana kolikoly mampiahiahy izany, raha ny fanazavana.
Tatiana A
French