Omaly, nidina teny Ampasapito, nitsidika ny tsena tsimialonjafy indray ny ben’ny Tanàna Andriantsitohaina Naina sy ireo mpiara-miasa aminy.
Nihaino mivantana ny hetahetan’ireo mpivarotra ny tenany ary nankahery azy ireo amin’ny fiatrehana ny fiainana. Novalian’ny ben’ny Tanàna avy hatrany ny fanirian’ireo mpivarotra eny an-toerana. Nambarany fa ho laharam-pahamehana ny fikarakarana ny taratasin’izy ireo hampamarin-toerana azy amin’ny asa fivelomany.
Hamoraina ihany koa ny fikarakarana ny antontan-taratasy rehetra ilaina mba hanaovana ny “enrollement” hoentina mandamina ireo mpivarotra ao amin’ny tsena Tsimialonjafy.
Hotadiavina ny marimaritra iraisana eo amin’ny kaominina sy ny mpivarotra mahakasika ny fandoavana ireo “arriéré” izay mbola tsy voaloan’izy ireo.
Manoloana ny tsy fisian’ ny tatatra fivoahan’ny rano maloto dia nilaza ny ben’ny Tanàna fa hampiana ireo mpivarotra amin’ny fanamboarana izany.
Nankasitraka ny ben’ny Tanàna, Andriantsitohaina Naina, ireo mpivarotra satria mahatsiaro ho manana raiamandreny mpiahy izy ireo.
Nilaza moa ny filohan’ny fikambanan’ny mpivarotra eny an-toerana fa miisa 160 ireo “box” eny amin’ny tsena Tsimialonjafy Ampasampito. Ny fivarotana “brocanteur” sy ny hotely fisakafoana no tena anisan’ny mampiavaka ity tsena ity.
Tatiana A
French