Distrika anisan’ny ahitana zaza tratran’ny tsy fanjarian-tsakafo mahery vaika i Farafangana, araka ny fanadihadiana SMART taona 2022, natao teny ifotony. 8,6% ny tahan’izany eo amin’ny ankizy enim-bolana ka hatramin’ny 59 volana.
Mitohy ny hetsika sosialy ataon’ny solombavambahoaka voafidy ao amin’ny distrikan’i Farafangana, Raheriarijaona Regina Clarisse, miaraka amin’ny Ofisim-paritra momba ny fanjarian-tsakafo (ORN) ary ny minisiteran’ ny Mponina, taorian’ny fandalovan’ny rivodoza farany teo. Fianakaviana marefo avy amin’ ny tokantrano 826 ahitana zaza latsaky ny 5 taona sy vehivavy bevohoka sy mampinono tsy ampy sakafo no nisitraka “rations de protéction” ny faran’ny herinandro teo. Nahazo tombontsoa tamin’ izany ireo fianakaviana ao amin’ny fokontany Bemahala, Agnaviavy ary Sarambendra, kaominina Tovona, distrikan’i Farafangana, faritra Atsimo Atsinanana..
Nizarana vary 25 kg, tsaramaso 5 kg, menaka 1 litatra ny isan- tokantrano. Tafiditra ao anatin’ ny fanampiana ny mpiara-belona sy ny ady amin’ ny tsy fanjarian- tsakafo amin’ny faritra Atsimo Atsinanana, indrindra ao amin’ ny distrikan’ i Farafangana, araka ny fanazavan’ ny depiote. «Mahavonjy anay ny tohana satria lasan’ny ranobe sy ravan’ny tafiotra ny voly rehetra ka sahirana izahay amin’ny sakafo andavanandro”, hoy ny renim-pianakaviana, mponina ao amin’ny fokontany nahazo sakafo.
Hitohy ny hetsika fanohanana ny fianakaviana marefo satria sahirana ara-tsakafo ny ankamaroan’ny mponina satria ravan’ny orana sy ny tafiotra ny voly sy ny fihariana.
Vonjy A.
French