“Tsy hanao fikaonandoha hakana seza ny Hiffim”, hoy ny mpitarika ny Hetsika iombonana ho amin’ny fanarenana sy fanorenana ifotony an’i Madagasikara (Hiffim), Andriamiseza Alain, manoloana ny disadisa eo anivon’ny vovonana tarihiny. Tsy hanao fikaonandoha mba hofidian-dRanona na Ranona ry zareo. Tsy misy olona manampahaizana sy manan-tsaina ary manam-panahy ve eto ? Hita eny ihany ny fitaizana sy ny traikefa ary ny fahaiza-manao, rehefa mandeha ny raharaha.
Tsy maintsy misy hatrany ny tsy fitovian-kevitra amin’ny politika. Tsy fitovian-kevitra ve no itondrana ny raharaham-pirenena sy hanatsarana ny fiainam-bahoaka sa fialonana sy hambompo fotsiny? Hanovana rafitra sy ny lalàna ny fikaonandoham-pirenena, fa tsy fakana seza. Handehanana any amin’ny fifidianana, mangarahara, eken’ny rehetra ary tsy azo lavina ny vokatra azo aminy fa tsy maintsy hampiharina izany.
Tsy mbola manapa-kevitra hanohana kandidà ny Hiffim
“Tsy mbola manapa-kevitra hanohana kandidà ny Hiffim amin’izao”, hoy izy. Manana safidy malalaka amin’izay ho tohanany ry zareo. Raha tsy misy hitondra ny foto-keviny amin’ny fanorenana ifotony, tsy hisy ny fanohanana kandidà fa manana olona harotsaka ny hetsika. Manao propangady ny Hiffim amin’izao, fa foto-kevitra no anaovana izany.
Tsy maintsy apetraka eto Madagasikara ny demokrasia tena izy sy ny fanjakana tan-dalàna. Efa mikororosy fahana mankany amin’ny ady an-trano isika. Misy tsy mahazo miteny; nefa ny sasany, mahazo… Manakiana ny fanakantsakanana ny fiheketsehana ataon’ny mpanohitra na ankolafin-kery hafa ry zareo. “Avelao halalaka ny demokrasia, ampiharo ny fanjakana tan-dalàna”, hoy ihany izy.
R. Nd.
French