Tontosaina anio eny amin’ny Tranombokim-pirenena Anosy ny hetsika “Ny sora-piainan’i Gabhy”, hetsika tafiditra ao anatin’ny “Iray volana ho an’i Gabhy”. Famelabelarana sy fampahafantarana ny nodiaviny tamin’ny fiainany no hatao amin’izany. Ny minisiteran’ny Serasera sy ny kolontsaina, miaraka amin’ny Fikambanan’ny Mpikanto teny sy soratra malagasy na FMTS no mikarakara ny hetsika. Ny volana marsa iray manontolo izay natokan’ny minisitera hahatsiarovana an’i Ghaby na Rabehasina Gabriel.
“Ireny hirantsika ireny… vetsom-po mamelovelo”. “Maty namela mamy”. Io no mahalaza ity kintan’ny haikanto malagasy ity. Rabehasina Gabriel na Gabhy, izay mpanakanto feno satria sady mpihira no mpamoron-kira. Ankoatra izay, nanoratra tononkalo ihany koa izy. “Tsara ny hahafantaran’ny tanora ankehitriny ny tantaran’ny kintan’ny haikanto malagasy sahala amin’itony mba ho fakan-tahaka ho azy ireo sy hahafantarany ny zava-bitan’izany kintan’ny kanto malagasy izany”, hoy Rakotondrazafy Andriantongarivo Lalatina, minisitry ny Serasera sy ny kolontsaina, taorian’ny hetsika fampirantiana an-tsary ny fiainany, indrindra ny teo amin’ny maha mpahay kanto azy. Hotanterahina anio ny famelabelarana momba ny sora-piainany. Ho hita ao ny dingam-piainana sy ireo sedram-piainany. Anisan’izany ny teo anivon’ny tokantranony sy ny teo amin’ny kanto. Ankoatra ireo, hisy ihany koa ny seho an-tsehatra sy ny hetsika maro samihafa.
Lin (Mpianatra asa)
French