Tsy nisy ny zava-bita montsana saingy nitranga ny tsy nampoizina, nandritra ny fifaninanam-pirenena, taranja atletisma Telma semi-marathon. Fifaninanana, notanterahina teto Antananarivo, omaly alahady. Resin’i Fulgence, atletan’ny Crown, Vakinankaratra, efa 47 taona i Mampitroatse, anisan’ireo nanjakazaka tamin’ity halavirana 21 km ity. Nandrasan’ny rehetra ny fihaonana teo amin’ity sokajy lehilahy ity. Raha hiverenana, nitarika hatrany amin’ ny 10 km i Mampitroatse, saingy nihoaran’i Fulgence avy eo. “Tsara ny fanomanana ary efa 3 volana nanaovana fanazaran-tena, ny tenako. Vonona aho ny hiaro ny voninahi-pirenena amin’ny lalaon’ ny Nosy saingy miantso fanohanana avy amin’ny fanjakana”, hoy izy.
1 ora 07 mn 54 s ny fe-potoan’i Fulgence. Faharoa, i Jean-Claude, nahatontosa ny fifaninanana tao anatin’ny
1 ora 08 mn 21 s ary fahatelo, i Mampitroatse, avy amin’ny Cospn Boeny, 1 ora 08 mn 49 s.
Voahosotra ho tompondaka teo amin’ny vehivavy, Razafindrafomba Nanie, avy amin’ ny AS Fanalamanga, izay nahavita izany tao anatin’ny1 ora 27 mn 01 s. Azo lazaina fa nandeha irery i Nanie, tamin’ ity satria tsy nahasongona azy hatrany am-boalohany ka hatramin’ny farany. Faharoa, i Rabemihiotra Oliva (Cospn), 1 ora 28 mn 59 s ary Ramanankasina Rosa ny fahatelo, 1 ora 31 mn 33 s. Ankoatra ny mpifaninana malagasy, nisy maorisianina iray nandray anjara. Ankoatra ny medaly, nomen’ ny Telma, lelavola 200.000 Ar ireo mpandresy. Nambaran-dRaherison Dominique, filohan’ny federasiona fa hiatrika ny lalaon’ny Nosy, ireo 5 tonga voalohany.
Torcelin
French