Zava-dehibe ny fandraisana an-tanana ny ara-pahasalamana eny anivon’ny orinasa sy ny minisitera. Nomena fiofanana mifandraika amin’izany ireo tompon’andraikitra isan-tsokajiny tao amin’ny minisiteran’ny Fanabeazam-pirenena .
Nofanina tetsy amin’ny LMA Ampefiloha, mikasika ny fanentanana ireo mpiasa eo anivon’ny minisiteran’ny Fanabeazam-pirenena, hiditra ho mpikambana ao anatin’ny sehatra fandraisana an-tanana amin’ny ara-pahasalamana na ny «Mutuelle de santé» ireo tomponandraikitra voakasik’izany, ny faran’ny herinandro teo.
Anisan’izany ny Ofisy nasionaly misahana ny fisorohana ny voina an-tsekoly (Onapascoma) foibe sy ireo tomponandraikitra eny anivon’ny faritra amin’ny sehatry ny fanabeazana ary ireo tomponandraikitra misahana ny toeram-pitsaboana eny anivon’ny sekoly. Eo koa ny tomponandraikitra misahana ny fitantanana sy ny ara-bolan’ny «Pascoma».
Tanjon’ny fiofanana ny hananan’ireo mpisehatra ny teknika fanentanana sy fampahafantarana ity tetikasa ity. Eo koa ny hampandeha sy hampizotra tsara ny fandraisana an-tanana amin’ny ara-pahasalamana. Tanjona hatrany ny hisian’ny vokatra tsara eny anivon’ny sekoly.
Kendrena ny hanamafy ny fahalalana efa ananan’ireo tomponandraikitra. Mila mahay mandray ireo mpiasa, mpampianatra sy ny hafa hiditra ho mpikambana izy ireo. Nomena azy ireo ny fahaiza-mandresy lahatra sy manome torolalana ary mampahafantatra ny andraikitra tokony horaisina amin’ireo vao hiditra ho mpikambana mikasika an’io fandraisana an-tanana amin’ny ara-pahasalamana io.
Hatomboka any amin’ny distrikan’i Befandriana Avaratra sy Antananarivo Renivohitra ary Fianarantsoa ny tetikasa andrana. Aorian’izany ny fanitarana any amin’ny faritra 23 rehefa hita ny fahombiazan’ny tetikasa natomboka.
Tatiana A
French