“Mahatsapa ny FFKM fa mitombo ny fifampihantsiana. Koa manamafy ny antso efa nataony ny FFKM hitandroana hatrany ny fiadanana sy ny fandriampahalemana ary ny fihavanana ka hampitsaharana ny herisetra amin’ny endriny rehetra.” Io ny fanambaran’ny FFKM, novakin’ny filohany, ny mpitandrina Andriamahazosoa Irako Ammi, tamin’ny famaranana ny fihaonambe voalohan’ny solontenan’ny faritra FFKM 35, teny amin’ny Fofikri, Ilafy, ny faran’ny herinandro teo.
Lohahevitra tamin’izany ny hoe “Fiangonana miray saina mba hanome aina ny fiombonan’ny fiangonana sy hanorina firenena vanona”, nibanjinana ny fananganana Andrimaso FJKM amin’ny fanaraha-maso fifidianana. Nivoitra tamin’ny fihaonana àry ny maha mpaminany ny fiangonana, ka sahy hijoro ho vavolombelona hampiaina ny fahamarinana sy hanamafy ny fiombonana, araka ny Soratra Masina.
Koa manainga ny rehetra ao anatin’ny FFKM izy hamelona aina indray ireo rantsamangaika sy hanangana ny Andrimaso. Izany no hiandraikitra ny fanabeazana olom-pirenena vanona mba ho kristianina mijoro sy mandray andraikitra amin’ny firenena izay fijoroana ho vavolombelon’ny famonjen’i Kristy izay, mikendry ny hampanjariana ny fiadanan’i Kristy eto Madagasikara mba hahairay ny Malagasy rehetra.
Ilaina ny fampanjakana sy fiarovana ny fahalalahana
Eo koa ny fampanjakana sy fiarovana ny fahalalahana: ny zo fototra maha olona tsy mifanohitra amin’ny famaritan’ny fiangonana; ny fanaraha-maso ny fiatrehana ny fifidianana mialoha sy mandritra ary aorian’ny androm-pifidianana; ny fitandroana ny rariny sy ny hitsiny eo amin’ny fiarahamonina eto Madagasikara. Anisan’izany ny ady amin’ny kolikoly sy ireo fihetsika miendrika fanamparam-pahefana. Koa miantso ireo zanaky ny fiangonana hijoro ho vavolombelona mahatoky an’i Jesoa Kristy amin’ny asa atao ao anaty ankohonana sy any amin’ny fiarahamonina ary eo anivon’ny firenena ny FFKM.
Manentana ny rantsamangaika rehetra tandrify ny fanomanana fifidianana mba hanamora ny fanamarinana rehetra koa ny FFKM. Manentana azy ireo koa hijery ny fanatsarana ny lalàm-pifidianana mba hisian’ny fifidianana marina sy madio ary mangarahara. Ny fahamarinana manandratra avo ny firenena. Koa manentana ny vahoaka kristianina sy ny mpitondra ary ny vahoaka malagasy hiaina ny fahamarinana voarakitra ao amin’ny didin’ Andriamanitra.
R. Nd.
French