Nanadihady momba ny fiahiana manokana ny olona manana fahasembanana nandritra ny fisian’ny valanaretina Covid-19 tao anatin’ny faritra enina be mponina indrindra ny fikambanana Autisme Madagascar. « Mitovy isika miatrika ny Covid-19 » ilay tetikasa ary niompana tamin’ny faritra Boeny, Atsinanana,Vakinankaratra, Amoron’i Mania, Atsimo Andrefana ary Analamanga. Nivoitra taorian’ny fanadihadiana notanterahina nandritra ny enim-bolana fa tsy manana politika mazava fiahiana ny olona marefo i Madagasikara rehefa misedra krizy toy ny valanaretina na voina hafa.
Tao anatin’ny fiatrehana ny Covid-19 nanome vola hanohanana ny vondron’olona marefo ny fanjakana fa tsy nanokana sora-bola ho an’ny olona manana fahasembanana. Rehefa nizara fanampiana Vatsy tsinjo na Tosika fameno ny mpitondra, nahatsapa ireo olona manana fahasembanana fa voailika satria 69,1% tamin’izy ireo tsy nisitraka. 1,8% amin’ireo olona manana fahasembanana no nahafantatra fa misy fizarana tohana sosialy.
Nandritra ny taona 2020, nanome vola mitentina 116 miliara Ar ho an’ny fiahiana sosialy ny fanjakana ka 24 miliara Ar mahery ny anjaran’ny minisiteran’ny Mponina miahy mivantana ny olona manana fahasembanana. Nambaran’ ny Autisme Madagascar fa tokony hojerena akaiky ny fampiasan’ny minisitera tsirairay ny vola ho an’ny fiahiana sosialy ao aminy. Betsaka rahateo ny ONG sy fikambanana misehatra amin’ny fiahiana sosialy ka tokony hiara-hiasa amin’ny minisitera voakasika izy ireo.
Natolotra omaly, tany Toamasina, ny valin’ny fanadihadiana natao.
Vonjy
French