Manoloana ny hetsika fitakiana nataon’ny mpianatry ny oniversiten’Andrainjato tamin’ity herinandro ity, nanao fanambarana ny sendikàn’ny mpampianatra mpikaroka (Seces), sampana Fianarantsoa fa toherin’izy ireo ny fidiran’ny mpitandro filaminana ny faritry ny oniversite sy ny fanalana ny “franchise universitaire” nahafahan’izy ireo niditra sy nisambotra mpianatra nandritra ny hetsika. Nanelingelina sy nampisavoritaka ny mponina teny amin’ ny manodidina rehetra koa ny fampiasan’ny mpitandro filaminana ny baomba mandatsa-dranomaso. Mbola nanamafy ny mpampianatra fa ilaina ny fizakantenan’ny oniversite satria sehatra tokony hahafahana maneho hevitra an-kalalahana sy hamolavolana olombanona. Fanehoana hevitra ny fahafahana manao fitakiana.
Rehefa misy ny olana toy ny tsy fandoavana ny vatsim-pianarana, mila mizara ny vaovao marina ny tomponandraikitra ho an’ny mpianatra hampitony azy ireo. Mampahatsiahy koa ny mpampianatra mpikaroka fa tsy tokony hiandry ny Seces hihetsika koa ny tomponandraikitra vao hanefa ny ampahany amin’ny saran’ny ora fanampiny ho an’ny taom-pianarana 2018-2019 sy ny fanatanterahana ny “décret” telo.
Vonjy
Hivoaka amin’ny herinandro ny tetiandro
Taorian’ny hetsika fitakiana vatsim-pianarana nataon’ny oniversite telo : Mahajanga sy Fianarantsoa ary Toamasina, namoaka fanambarana miaraka ny minisiteran’ny Fampianarana ambony sy ny minisiteran’ny Paositra. Hanome ny vatsim-pianarana dimy volana sy ny vola fampitaovana izy ireo manomboka ny herinandron’ny 17 avrily ho avy izao. Ny famaranana ny lisitry ny mpianatra hisitraka vatsim-pianarana avy any Toliara no nandrasana omaly, hahafeno ny antontan-taratasy ho an’ny oniversite enina, araka ny fanazavana. Hivoaka amin’ny herinandro ny tetiandro fizarana ny vatsim-pianarana manerana ny Nosy.
French