Nivarahontsana i Eoropa iray manontolo, ny talata lasa teo, taorian’ny nandresen’ny Manchester City ny Bayern de Munich, tamin’ny isa mavesatra 3 no ho 0, nandritra ny lalao ampahefa-dalana mandroso, hiadiana ny ho tompondakan’i Eoropa “Ligue des champions”, taranja baolina kitra. Fihaonana notanterahina tao amin’ny Etihad Stadium.
Tsy nisy tsy niresaka ity fahalavoan’ny ekipan-dRainiboto ity avokoa ny gazety rehetra manerana an’i Eoropa. “Bye bye Bayern”, hoy ny Daily Mirror. “Nanokatra ny lalana any amin’ny manasa-dalana ny City”, araka ny lohatenin’ny L’équipe.
Raha ny fahitan’ireo manam-pahaizana amin’ny baolina kitra any Eoropa, ho saro-dalana ny Bayern de Munich, na mbola handray ny lalao miverina aza. Nanantombo teo amin’ny fifehezana ny kianja mantsy ny Citizens, tamin’iny lalao voalohany iny. Porofon’izany, niisa 9 ny daka nataon’ny Anglisy ka 3 maty raha 4 monja ny an’ny Alemà. Raha tsiahivina, nampiditra ny baolina voalohany i Rodri, teo amin’ny minitra faha-37. Nampian’i Bernardo Silva indray, teo amin’ny minitra faha-70 ary nofaranan’i Erling Haaland, minitra faha-76.
Tetsy an-kilany, resin’ny Inter de Milan, tamin’ny isa 2 no ho 0, ny Benfica de Lisbonne. Ny 19 avrily ho avy izao ny lalao miverina eo amin’izy ireo ka handray ny City ry zareo Bayern ary hampiantrano ny Benfica kosa ny Italianina.
Tompondaka
French