Zoma mahafinaritra hatrany… Hafana indray ny faran’ny herinandro amin’ity indray mitoraka ity. Anio, manomboka amin’ny 7 ora sy sasany hariva, hiaka-tsehatra etsy amin’ny Le Zoma Antaninandro ny tarika Fa’ meno. Ivondronana mpanakanto anisan’ny manana feo miavaka sy ny fahaiza-mampiaraka izany. Maro ny hiran’ izy ireo efa heno amin’ny haino aman-jery sy any amin’ ny tambajotran-tserasera. Anisan’izany ny “Ngaoma”, “Ambohimandroso”, anisan’ ireo hira nahafantarana ny tarika Fa’meno rahateo.
Amin’ny ankapobeny, gadona milamindamina mandrotsy ny fo amam-panahy no tena iangalian’izy ireo. Na izany aza, mahafehy gadona samihafa ry zareo. Tsy hijanona amin’ny anio fa ho maro ny sehatra sy seho vinavinain’ny tarika hatao manomboka izao. Hiatrika mivantana ka hanakaiky ireo mpitia zavakanto ho tonga eny an-toerana ny tarika, anio.
Tanjona ny handeha lavitra haneho sy hanandratra ny mozika malagasy, raha ny fanazavan’ny mpikambana. Anisan’ny manampy hanatrarana izany ny fifamenoana talenta ao anatin’ny tarika sy ny fahaiza-miaraka.
Nanangona :
HaRy Razafindrakoto
French