Karazam-basy tsy mbola fampiasa eto ity hitan’ny mpitandro filaminana tao amin’ny lalana mihazo an’i Mangarano, Toamasina I ity, ny alin’ ny zoma 14 avrily teo. Tamin’ny 8 ora sy sasany alina, raim-pianakaviana iray hamonjy fodiana nitondra moto no nosakanan’ny jiolahy roa lahy tao Ambalamanasy. Nitondra basy ireto olon-dratsy ka nanome tsy fidiny ny moto ilay tompony. Nirifatra avy hatrany ireo jiolahy. Nahita ny zava-nisy, narahin’ny mpitondra bajaj ireo roa lahy naka ny moto. Nihazo lalan-dratsy miditra ny fokontany Mangarano, nilatsaka tamin’ny tany ilay jiolahy taoriana, nitaingina ilay moto halatra sy ny basy teny aminy. Nahita ny bajaj nanaraka azy sy ny mpitandro filaminana, raiki-tahota ka nanao tongotra an-katoka io olon-dratsy io. Vokany, noraisim-potsiny ny basy latsaka tamin’ny tany. Nataon’ ny mpitandro filaminana ny fanadihadiana. Basy tsy fampiasa hatramin’izay teto an-toerana ity sarona ity. Misokatra ny fanadihadiana ary andrasana ny tohin’ny raharaha.
Sajo
French