Anisan’ny fositra manimba ny fiarahamonina malagasy ankehitriny ny fahaverezan-kasina. Toa samy mandeha an-jambany avokoa sisa ny sarambabem-bahoaka. Tsy mahagaga raha tonga hatrany amin’ny fametavetana sy fahasahian’ny mpanao ratsy miseho masoandro, tsy amin-tahotra. Ilay maha olombelona mihitsy no efa voahosihosy sy atao ambanin-javatra. Hatramin’ny nomem-pahefana mba hiaro sy hianteherana aza izao mitazam-potsiny. Firifiry ny mitaraina amin’ny herisetra ara-nofo sy ny voaolana saingy izy ireny no voaeso ho miseho milay sy rangory fototry ny afo.
Mampahonena ny mahita sy mahare ireo sokajy marefo, voatery miaritra ny tsy rariny sy ny tsindrihazolena. Mahakivy ny mahita ny toeram-pilokana etsy sy eroa, eny fa na eny akaikin’ny biraon’ny mpitandro filaminana aza. « Mianara mba miteny na manao fanamarihana moa e ! », izay sahy mitoroka no mahazo vava ratsy. Mampiraviravy tanana ny zava-misy. Tena mampisitri-belona, satry tsy hivoaka ny tokantrano, raha mbola azo atao. Izay jerena sy iainana tena lo avokoa.
Tsy mahagaga raha mivadika tsikelikely any amin’ny fampiasan-kery sy fanjakan’i baroa ny eto Madagasikara. Manomboka miakatra indray io ny tahan’ny fanaovana fitsaram-bahoaka. Eny ifotony miakatra amin’ny ambaratongam-pahefana isan-karazany no hahenoana kiana amin’ny kolikoly sy ny tsimatimanota. Zary fiainan-dRamalagasy izany hoe mizatra ny ratsy. Izay heverina fa tsara sy araka ny tokony ho izy, izay tsy mibirioka indray no adala !
Tsy hotazanim-potsiny izay. Tsy maintsy sintonina andro aman’alina ny lakolosy. Hita sy tsapa ny ezaka ataon’ny minisitera mpiahy amin’ny lafin-javatra maro. Mihazakazaka izaitsizy ny famerenana ireo tranom-bakoka sy ny tahirin’ny haren-tsaina maha Malagasy. Sanatrian-dresaka hanao volo mpanoha randrana, na hamendrofendro ny hafaliam-pon’ny sasany fa misy ny tena tsy azo dikaina. Zava-dehibe ny fotodrafitrasa, fa mainka manan-danja kokoa ny fitombenan’ny maha olona amin’ ny toerana sahaza azy.
Ny tiana ahatongavana dia ny fanetsehan’ny tomponandraikitra rehetra, hitady hevitra amin’ny famerenana ny atao hoe « hasina » sy ny soatoavina « tena izy ». Zary baikoin’ny vola sy ny rendrarendra ivelany avokoa ny zava-drehetra. Zary an-jorombala ny fahaiza-miaina izay andry hiankinan’ny filaminana sy fitonian’ny fiarahamonina. Tsy mahagaga ilay fikorosohampahana faobe.
Tsiahivina fa izay tia manara-dalàna sy manaja lamina ihany no afaka mandroso. Taon-trano tsy efan’ny irery izany fa mila fiarahan’ny besinimaro resy lahatra. Mitaky fandraisana andraikitra bebekokoa sy fanomezana ohatra tsara avy amin’ny mpitondra fanjakana ihany koa izany. Tsy ampy ny lahateny tsara lahatra. Mitaky asa sy vokatra azo tsapain-tanana ny fivoizana ilay kolontsaina malagasy. Tsy misy ny « majiamajia » fa tsy maintsy fandaharanasa matotra sy asa mivaingana ilay izy !
r.r
French