Nampianatra sy nanabe olona maro teo amin’ny tontolon’ny dihy. Taona 2023, mandia ny faha-25 taonany ny Compagnie Rary. Naneho ny mampiavaka azy ry zareo…
Iray amin’ireo sehatra ivelarana talenta maro eo amin’ny tontolon’ny dihy sy fianarana izany ny Compagnie Rary. Notanterahina, ny sabotsy 22 avrily teo, teny amin’ny kianja Maitso Analamahitsy ny seho « Feo sy amponga » fankalazana ny faha-25 taonan’ity sekoly sady toeram-pikarohana momba ny tontolon’ny dihy sy ny fanabeazana ity. Anisan’ny nasongadin’i Ariry Andriamoratsiresy, mpanorina ny Compagnie Rary ny maha zava-dehibe ny fahaizana manoratra ny dihy. « Iny 25 taona nolalovana iny no namolavolana ny teknika fanoratana dihy », hoy izy.
Nohamafisiny fa mbola vitsy ihany ny mahay manoratra dihy. « Hafa mihitsy ilay dihy soratana satria ipoiran’ny famakafakana sy fijerena ifotony (analyse) raha hoarina amin’ny dihy alaina amin’ny « vidéo », hoy hatrany izy. Izay mianatra ao amin’ny Rary, tokony hahay manoratra, raha ny fanazavany hatrany. Tanjona ny hampita io teknika sy fomba fanoratra ny dihy io, amin’izao hidirana amin’ny 25 taona manaraka izao.
An’arivony maro ny mpianatra nandalo tao
Fantatra fa nandritra izay 25 taona niorenan’ny Compagnie Rary izay, an’arivony maro ireo mpianatra nandalo sy nianatra ary nandalina momba ny tontolon’ny dihy tao. Napetraka hatrany ny maha fitaizana ny dihy sy izay mifamatotra aminy. Tia sy manana fikirizana, mahay mamorona, sns. Tia mamorona sy mahatana hatrany ny fikirizana ny mpianatra tsirairay.
Raha ny fanazavan’i Ariry Andriamiratsiresy rahateo, « sady fitaizam-batana, mikajy ny rafi-batana no ahafahana maneho sy mamoaka ny maha izy ny tena (improvisation) ny dihy ». Fantatra fa azo atao ny mivelona amin’ny dihy. Raha te ho lasa lavitra amin’izany, ny famarotana ny asa any ivelany no tsara kokoa.
HaRy Razafindrakoto
French