Niavaka ny fankalazana tamin’ity taona ity ary maro ny liana tamin’izany. Manodidina ny 3000 mahery ny tonga nanotrona, misy avy amin’ny fikambanana samihafa, ASIEF, MJS, federasiona ary ireo olon-tsotra. Nanatanteraka hazakazaka nanodina ny Lapan’ny Tanàna ireo mpandray anjara, avy eo niaraka nandihy sy nampihetsi-batana. Karazana dihy maro no nifanesy toy ny zumba, fit fight, danse de salon, danse sportive, danse orientale, danse africaine sy ny maro hafa. Nandray anjara mavitrika tamin’izany ny teo anivon’ny federasiona malagasin’ny dihy ara-panatanjahantena, notarihan’ny filohany, Randrianarisoa Rijamanitra.
“Tratra ny tanjona, afaka niaraka nanao fanatanjahantena ny rehetra”, hoy ny nambaran’ny Tale jeneralin’ny spaoro, eo anivon’ny minisiteran’ny Tanora sy ny fanatanjahantena, Rakotozafy Rosa. Hahafahana miady amin’ny aretina sy manampy amin’ny fahasalamana, hoy izy, ny fampihetseham-batana. Tsiahivina fa fiaraha-miasa eo amin’ny minisiteran’ny Tanora sy ny fanatanjahantena sy ny OMS (Organisation mondiale de la santé) ity hetsika ity ary tohanan’ireo mpiara miombon’antoka marobe, toy ny kaominina Antananarivo Renivohitra sy ny orinasa Telma, mpanohana voalohany ny fanatanjahantena.
Nambaran’ny mpikarakara fa mbola hisy ny hetsika ho an’ny faritra. Hamaly ny fangatahan’ny maro ihany koa ny MJS ka hatao matetika ny fiarahana manatanja-tena toy izao.
Mi.Raz
French