Karohina ny vahaolana maharitra hikojakojana ny lemaka voatondraka eto amintsika. Tokony ho ampy tsara ny voka-bary eto an-toerana, raha voakojakoja araka ny tokony ho izy ny fotodrafitrasa ara-pambolena.
Atao eto Antananarivo, ny 27 sy 28 avrily izao, ny atrikasa ho fitadiavana vahaolana maharitra amin’ny fikojakojana ireo lemaka voatondraka eto Madagasikara. Mandray anjara daholo ny mpisehatra amin’ny fambolena rehetra, ahitana ny fanjakana isan-tsokajiny, tarihin’ny minisitera, ny solontenan’ny tantsaha, toy ny fikambanan’ny mpampiasa rano, ny teknisianina sy ny mpitantsoroka ara-teknika, sns. Nambaran’ny minisitry ny Fambolena, Ramilison Harifidy, fa mahatratra 134.000 ha ny lemaka voajary eto Madagasikara. Raha ny lafiny vary, ahazoana vokatra maherin’ny 500.000 taonina io velarana io, isaky ny mamboly, amin’ ny salanisa 4 t/ha. Tafakatra 1.000.000 t izany raha indroa mamboly isan-taona. Notsorin’ ny minisitra, fa « tsy tokony hanafatra vary any ivelany i Madagasikara raha ireo tarehimarika ireo ».
Manana ny andraikiny ny mpampiasa rano
Nomarihiny anefa fa tsy ampy ny famatsiam-bary eto amintsika satria tsy voakojakoja araka ny tokony ho izy ny fotodrafitrasa, toy ny tohodrano. Eo koa ny haratsian-dalana, ka tsy tafavoaka ny vokatra any amin’ny toerana lavitra. Manampy ireo ny fiovan’ny toetr’andro.
Tanjona amin’ity atrikasa ity ny hikarohana vahaolana maharitra ahafahana mikojakoja maharitra ny fotodrafitrasa ara-pambolena. Hoentina any amin’ny faritra sy eny ifotony ny fehin-kevitry ny vahaolana tinapaky ny fivoriana. « Manana ny andraikiny lehibe amin’izany ny tambajotra federasiona mampiasa rano, satria izy ireo no tena voakasika mivantana eny ifotony », hoy ihany ny minisitra Ramilison Harifidy.
Njaka A.
French