Notanterahina teny amin’ny Lapan’ny Akademia Malagasy Tsimbazaza, ny velakevitra “Fampiharana ny Politikan’ny teny: Ny teny malagasy vaovao”. Ny tolakandron’ny alakamisy 27 avrily 2023, no nanatanterahana azy ity, vela-kevitra tafiditra tao anatin’ny lahadiniky ny fivoriambe iombonan’ny Akademisianina. Andriamihaja Solonavalona, nandalina manokana momba ny abidia sy ny fanisana malagasy, no nitondra ny famelaberan-kevitra. “Teny malagasy vaovao manaraka ny fitsipika sy ny lalàna izy ity. Vaovao satria abidia malagasy vaovao no ampiasaina. Vaovao ihany koa satria firafitry ny fanisana vaovao no ampiasaina”, hoy i Andriamihaja Solonavalona, nitondra ny velakevitra.
Roanjato taona lasa izany no nandraisan’ny mpanjaka Radama I ny fanapahan-kevitra ny hanoratana ny teny malagasy, ary tsy atao sorabe izany fa atao abidia. Tamin’ izany, ny fonetika frantsay no nanoratana ny zana-tsoratra ary ny fonetika anglisy no nanoratana ny reni-tsoratra, araka ny nambaran’ny mpanjaka tamin’izany. Ara-tantara ihany anefa, ny 1873, nisy ny fivadiham-pitokisana nataon’ny misionera tamin’ny fanovana ny abidy. Nisy ny fanafoanana litera ary nisy ihany koa ny fampidirana litera vaovao. Vokatr’izany, betsaka ny fahadisoan’ny abidia malagasy ankehitriny, araka ny nambaran’Andriamihaja Solonavalona.
Efa nisy ny fanarenana nataon’ny Akademisianina R. P Cadet, roa taona taorian’ny nitsanganan’ny Akademia Malagasy. Mitohy izany ankehitriny, nampiana litera 6 ny abidia malagasy ao anatin’ity politikan’ny teny vaovao ity. Nomena anarana hoe Abidia Malagasy 2023, ity abidia vaovao ity noho izy tafiditra ao anatin’ny fankalazana ny faha 200 taonan’ny Abidia Malagasy. Sahala amin’izay ihany koa ny fanisana, “Fanisana 2023”. Ho an’ny fanisana kosa indray, “Tsy manaraka ny fitsipika sy lalana fahatelon’ny fanisana ny fanisana malagasy” hoy Andriamihaja Solonavalona. Nisy fanolorana hevitra ny fanafoanana hetsy sy ny lavitrisa fa solona ny folo arivo sy ny zato arivo. Eo ihany koa ny fampiasana ny “Aotra” fa tsy “Zero”.
Lin (Mpianatra asa)
French