«Ho an’ny tanindrazana, ho an’ny tenin-drazana». Io ny lohahevitra iompanan’ny fifaninanana asa soratra, izay entina hanamarihana ny faha-10 taona nahaterahan-dRakotonirina Charles Victor, fantatry ny maro amin’ny solon’anarana maha mpanoratra, Nirhy-Lanto. Nisy ny fampahafantarana ny hetsika amin’ny ankapobeny sy ny fifaninanana manokana, omaly, tetsy amin’ny foiben’ny Havatsa-Upem, Tahala Rarihasina. Ity fikambanan’ny poeta sy mpanoratra izay nisy an’i Nirhy-Lanto ity rahateo no misahana ny fikarakarana, miaraka amin’ny fianakaviany.
«Loka Nirhy-Lanto 2023, andiany fahadimy – Amboaran-drindrambolana» no natao anarany. Nosafidiana manokana io lohahevitra voalaza eo ambony io, satria mifototra amin’ny tarigetra sy ny soridalam-piainana nodiavin’ny mpanoratra. Misokatra hoan’ ireo Malagasy maniry handray anjara rehetra ny fifaninanana, tsy hanavahana sokajin-taona na toerana. Mpanoratra olon-tokana kosa ny mpifaninana, ary fandraisana anjara iray ihany hoan’ny amboaran-drindrambolana iray. Mazava loatra fa asa soratra tsy mbola nivoaka no andrasana amin’ireo mpifaninana.
Ny sabotsy 29 jolay amin’ ny 12 ora atoandro ny fara fandraisana ny asa soratra hifaninanana. Hampahafantarina ny alakamisy 28 septambra kosa ireo sangasana voafidy amin’ny fifaninanana. Amin’io fotoana io ihany koa mantsy ny lanonam-panokafana ny “Volana iray, mpanoratra iray”, izay haompana amin’i Nirhy-Lanto sy ny sanganasany. Tsy hifarana ny hetsika raha tsy ny zoma 27 oktobra.
Zo ny Aina
French