Mitohy ny atrikasa mba hiarovana ny falalahana maneho hevitra sy mahazo vaovao ary fahalalahan’ny asa fanaovan-gazety. Omena lanja amin’izany ny fandrindrana ny fomba fiasa eny amin’ireo sehatra nomerika rehetra.
Hankalazaina anio, ny Andro maneran-tany ho an’ny fahalalahan’ny asa fanaovan-gazety. Misy, araka izany, ny atrikasa hahafahana mandrindra ny sehatra nomerika rehetra, hatao eny amin’ny Canal Olympia Andohatapenaka. Hetsika karakaraina sy eo ambany fiahian’ny minisiteran’ny Serasera sy ny kolontsaina, mandritra ny roa andro. Tanjona ny hanaraha-maso ny fomba fiasa eny anivon’ireo sehatra nomerika mba hiarovana ny falalahana maneho hevitra sy ny fahazoam-baovao.
Tsapa fa mivelatra sy mitombo ny fivoaran’ny fitaovan-tserasera sy ny teknolojia avo lenta eto amin’izao tontolo izao (Tweeter, facebook, Instagram…). Lasa fitaovana entin’ny olona hanaparitahana vaovao diso, tsaho, sy fanalam-baraka ary fandrangitana amin’ny endriny samihafa, izy ireny. Ny fahatsapana izany no antony nanaovana ny atrikasa, araka ny fanazavan’ny mpikarakara.
Anisan’ny maha maro ny atrikasa ihany koa ny maha taom-pifidianana ny taona 2023. Ankoatra izay, ho fiarovana ny fahalalahan’ny asa fanaovan-gazety sy ny fanehoan-kevitra ary ny fahazoam-baovao marina sy ny demokrasia izany. Indrindra manoloana ireo vaovao diso sy tsaho eny anivon’ny fitaovan-tserasera.
Handrasana, noho izany, ny hahafahana mandrindra ny fomba fiasa eny anivon’ny sehatrasa nomerika rehetra maneran-tany. Efa maro ny atrikasa natao hialana amin’ny fiparitahan’ny vaovao diso eny anivon’ny fitaovan-tserasera. Anisan’izany ny atrikasam-pirenena mikasika ny vaovao tsy marina, tamin’ny novambra 2022. Teo koa ny ady hevitra iraisam-pirenena momba ny fahatokisana ny “internet”, tamin’ny febroary lasa teo.
Mino (mpianatra asa)
French