Hohamafisina ny fiarovana ny zaza malagasy ka handray fepetra ny governemanta amin’ny tsy fahafahan’i Dylan Thiry miditra eto Madagasikara intsony. Nanao fanadihadiana avy hatrany ny polisy momba ny fivoahan’ilay hafatra niparitaka tamin’ny tambajotran-tserasera “facebook” mahakasika fanondranana zazakely ataona teratany vahiny iray antsoina hoe Dylan Thiry. Nanazava ny polisy fa raha ny lalàna manan-kery eto Madagasikara, voasazin’ny lalàna ny fanondranana an-tsokosoko olona indrindra fa ny famarinan-jaza amin’ny alalan’ny fananganana zaza eo amin’ny sehatra iraisam-pirenena tsy ara-dalàna ireny. Ny fanadihadian’ny polisy no nahafantarana fa ny taona 2022 no nivezivezy indroa teto Madagasikara i Dylan Thiry. Indroa niditra sisintany ary indroa nivoaka ny sisintany izy. Fantatra ihany koa fa tsy nisy zaza malagasy niaraka taminy nandritra ny fivoahany indroa ny sisintany, araka ny fanampim-panazavana avy amin’ny polisy hatrany. Araka ny voalazan’ny fehezan-dalàna andininy faha 37 sy, ao amin’ny lalàna 2014/ 40, afaka manenjika sy mitsara ary manasazy ireo olona mandika lalàna eo amin’ny sehatry ny fanondranana an-tsokosoko olona eto an-toerana na any ivelan’i Madagasikara ny fitsarana malagasy. Ny polisy rahateo koa efa nahazo baiko avy amin’ny tonian’ny mpampanoa lalàna ao amin’ny fitsarana ny hanokafana fanadihadiana momba izany.
J.C
French