Tafiditra ao anatin’ny firenena hanaovan’i Fary Lopes fampisehoana, amin’ity taona ity, i Madagasikara. Anisan’ny sangany eo amin’izany sehatra misy azy izany ity mpanao hatsikana ity, ary ao anatin’ny fitetezana firenena maro amin’izao fotoana izao.
Hotanterahina ny 21 mey 2023, eny amin’ny Novotel Alarobia, ny hetsika iarahana amin’i Fary Lopes, mpanao hatsikana “Stand Up” frantsay. Hetsika ara-koltoraly miavaka no hotanterahina amin’io fotoana io. Hisy ny filatroana, ny mozika ankoatry ny fampisehoana hatsikana izay tena hibahan-toerana amin’io fotoana io. Fotoana lehibe ho an’ny mpanao hatsikana malagasy, indrindra ny sokajy “Stand up”, izy ity, ahitan’izy ireo ny traikefa sy ny fahaiza-manaon’ny vahiny eo amin’izany sehatra izany. Omaly, teny Andraharo no nanatanterahana ny valandresaka ho an’ny mpanao gazety, nampahafantarana izany hetsika izany.
Mpanao hatsikana frantsay anisan’ny vao misandratra ary tena misongadina tokoa i Fary Lopes. Tafiditra ao anatin’ny mpanao hatsikana miara-miasa amin’ny trano mpamokatra Netflix izy. Amin’ny hatsikana, ataony lohahevitra misongadina tena voizina ny fiainan’olon-droa, ny fanavakavaham-bolonkoditra ary koa ny resaka politika. Nahafantarana azy voalohany ny fandaharana ONDAR na “On N’Demande qu’A en Rire”, tao amina fahitalavitra frantsay iray, ny taona 2010. Ny taona 2012 no nanomboka niditra teo amin’ny sehatry ny matihanina, tao amin’ny “Jamel Comedy Club”, izy. Nanomboka teo no nampisongadina azy tsikelikely teo amin’ny hatsikana frantsay sy manerana izao tontolo izao. Marihina fa vao avy nahita fahombiazana tamin’ ny seho nataony tao Paris sy tamin’ny Roland Garos, izy, mialoha izao handehanany eto Madagasikara izao.
Mahakasika ilay fampisehoana hataon’i Fary Lopes eto amintsika, hizara roa mazava tsara ny hetsika. Filatroana hanehoana ny fahaiza-manaon’ny mpamorona ao amin’ny Bogasy no handrafitra ny tapany voalohany. Eo ihany koa ny fampisehoana mozika Jazz, iarahana amin’ny tanora malagasy mpiangaly izany mozika izany. Hatsikana “Stand up” iarahana amin’i Fary Lopes no hameno ny tapany faharoan’ny hetsika.
Lin (Mpianatra asa)
French