Nitondra ny heviny koa ny filohan’ny Antenimierandoholona, manoloana ny raharaham-pirenena. Anisan’izany ny momba ny fifidianana.
“Ny fiezahana miatrika fifidianana amim-pahatoniana izao no atao mba hilamina aloha sy mandritra ary aorian’ny fifidianana. Mba hoeken’ny rehetra izay voka-pifidianana eo. Na inona na inona vokatra eo, tokony hoeken’ny rehetra.” Io ny fanehoan-kevitry ny filohan’ny Antenimierandoholona, Razafimahefa Herimanana, teny Tanjombato, afakomaly, manoloana izao itakiana sy ilazan’ny sasany ny firosoana amin’ny fitondrana Tetezamita izao.
“Gaga sy variana ihany aho amin’ny hevitra rehetra mitsiry etsy sy eroa”, hoy izy. Eo ny hoe fanovana ny Fitsarana avo momba ny lalàmpanorenana (HCC), fanovana ny Vaomiera mahaleo tena misahana ny fifidianana (Ceni), fidirana amin’ny fitondrana Tetezamita… Aza hadinoina efa dimy taona izao ny vahoaka malagasy no miandrandra ny hisian’ny fifidianana amin’ity taona ity, araka ny lalàmpanorenana. Mba hahazoan-dry zareo maneho hevitra ny fifidianana. Izay ny demokrasia.
Efa volana vitsivitsy alohan’ny fifidianana ve vao hamorona an’io antsanga tsy aman’orana rehetra io?
R. Nd.
French