Hampiroborobo ny toekaren’ny mponina sy hanampy amin’ny fiarovana ny ala honko ny tetikasa Batan, hatao ao amin’ny faritra Diana. Mahatratra hatramin’ny 9 miliara Ar ny vola hamatsian’ny Agence française de développement ity tetikasa ity.
Notanterahina omaly, teny amin’ny minisiteran’ny Toekarena sy ny fitantanam-bola ny tetikasa Batan. Tetikasa hanamafisana ny fiarovana ny tontolo iainana sy ny ala honko ao amin’ny faritra Diana. Hiara-hisalahy hanatanteraka izany ny minisiteran’ny Tontolo iainana sy ny fampandrosoana maharitra. Mitentina 9 miliara Ar na koa 2 millions d’euros kosa ny vola hamatsiana ity tetikasa ity. Vola azo avy amin’ny Agence française de développement (AFD).
Natao hiarovana ny fitrandrahana tsy ara-drariny ny harena an-dranomasina ity tetiksa ity. Ary koa ho fitantanana ny tontolo iainana maharitra ao amin’ny helodrano (baie) Ambaro, Tsimipaiky sy Ampasindravana ary ireo vondro-nosy (archipel) ao Nosy Be. Araka izany, “miisa 21 ireo vondron’olona ifotony hisitraka ny tetikasa. Mahatratra 2.500 isa kosa ireo tokantrano hahazo izany hoentina mampiroborobo ny faripianany sy ny fitrandrahana ny harena voajanahary azo avy amin’ny ala honko”, hoy ny fanazavan’ny minisitry ny Tontolo iainana sy ny fampandrosoana maharitra, Vina Marie Orléa.
Hetsika ara-toekarena
Mahatratra 21.000ha ny toerana voakasiky ny tetikasa ka hampiroborobo ny toekaren’ny mponina ao an-toerana. Voatanisa ao anatin’izany ny sehatry ny jono maharitra mba ho tombontsoan’ny besinimaro. Eo ihany koa ny fitantanana maharitra sy ny famerenana indray ny ala honko. Ary ny fanaovana hetsika samihafa ho fampivoarana ny sehatry ny jono, ny fizahantany ary ny fambolena honko ao Nosy Be sy ireo nosikely manodidina azy.
Henintsoa Hani
French