Nitsidika ny filohan’ny Antenimierandoholona, Razafimahefa Herimanana, ny ambasadaoro vaovaon’i Pakistan, Muhammad Arshad Jan, ny alarobia 17 mey teo.
Niompana tamin’ny fanamafisana ny fiaraha-miasa eo amin’i Pakistan sy i Madagasikara ny fihaonana, ary koa ny eo amin’ny Antenimierandoholona malagasy sy pakistaney. Maro ny seha-pihariana noresahana, ka anisan’izany ny lafiny fambolena sy ny fanodinana ara-tsakafo.
Marihina fa anisan’ny firenena tena mpamokatra vary i Pakistan, ka hohamafisina ny fiaraha-miasa sy ny fifampizarana traikefa.
Notsindrin’ny filohan’ny Antenimerandoholona (PS), Razafimahefa Herimanana fa ankoatra ny fandaniana ny lalàna, andraikitr’ity andrimpanjakana ity koa ny fiahiana ny vondrom-paritra itsinjaram-pahefana sady misolo tena ny vondron-draharaha ara-toekarena sy ara-tsosialy. Nomarihiny fa manamora ny fahatongavan’ny mpampiasa vola vahiny eto Madagasikara, anisan’izany ny orinasa avy any Pakistan.
Fikajiana ny tontolo iainana
Anisan’ny nankasitrahan’ny ambasadaoro pakistaney ny ezaka manokana ataon’ny Antenimierandoholona amin’ ny fikajiana ny tontolo iainana. Nanamarinany izany ny fambolen-kazo ataon’ity Andrimpanjakana ity. Nohamafisiny fa ady iombonan’i Madagasikara sy Pakistan ny ady sy ny fiatrehana ny fiovan’ny toetr’andro, ka hanaovana ho laharam-pahemehana ny fambolen-kazo.
Samy naneho ny fahavononany hanamafy ny fifandraisana sy ny fiaraha-miasa ny antenimiera roa tonta. Noresahana ny hananganana ny Vondrona fifankatiavana Madagasikara-Pakistan, hanamorana izany.
Njaka Andriantefiarinesy
French