Feno 10 taona ny sampan’ny Faribolana Sandratra ao Tanambe, Ambatondrazaka. Anatin’ny fanamarihana izany ireo mpiray faribolana, ka nosantarina tamin’ny famoahana ny “Ôsikalo” izy io, ny faran’ny herinandro teo. Anaran’ny boky, kanefa ihany koa anaran’ny endrin-tononkalo vaovao, vokatry ny fikarohan’i Kelly Randria izy ity. “Tononkalo, elanelanina ôsika kely sady fohy ny ôsikalo”, hoy ny fanazavan’ny mpamorona, izay sady mpandrindra ny sampana Faribolana Sandratra any an-toerana rahateo.
Raha toa ka 4 izy ireo tany am-panombohana, 25 eo izao ireo mpiray faribolana any Tanambe. Toa ny sampana velona rehetra, manao ny dinika literatiora, dinika boky, fitetezana sekoly arahina vela-kevitra, sns, izy ireo. Manam-pikasana hitondra ny ôsikalo hitety vazan-tany ry zareo, ho fampahafantarana ity endrika literatiora vaovao ity. Mazava loatra fa tsy maintsy hisy ny vela-kevitra hitondran’i Kelly Randria ny fanazavana bebe kokoa momba izany.
Zo ny Aina
French