Tonga nitsidika ny tobin’ny sampana mpamonjy voina, teny Tsaralalana, ny masoivohon’i Suisse miasa eto Madagasikara, omaly. Nandray azy teny an-toerana tamin’izany ny ben’ny Tanànan’Antananarivo Renivohitra, Andriantsitohaina Naina. Tafiditra ao anatin’ny herinandron’ny fandriampahalemana ny fitsidihana nataony. Mba hahafahana mamantatra ny fomba fiasan’ny mpamonjy voina eto Antananarivo, mikasika ny fiarovana ny ain’ny vahoaka sy ny fananany ny tanjona, raha ny fanazavana. Anisan’ny notsidihana ihany koa ny sampandraharaha mpandray ny antso vonjy ao an-toerana. Nisy ny fampisehoan’ireo mpamonjy voina teny an-toerana, ireo zava-bita sy ny asa atao mandritra ny tontolo andro ary ny mbola vinavina amin’ny ho avy, nandritra izany. Ankoatra izay, nanararaotra nijery ireo fitaovana hampiasaina entina manao ny asa vonjy aina ihany koa ny masoivohon’i Suisse tamin’izany. Hamantarana raha ampy sy mahasahana ny famonjena voina eto an-toerana ireo fitaovana ampiasaina amin’izany na tsia.
Mino (mpianatra asa)
French