Nisy ny marimaritra iraisana teo amin’ireo delegasion’ny Tahirimbola iraisam-pirenena (FMI) sy ny mpitondra fanjakana malagasy. Nisy ezaka vita ny fanjakana fa maro koa ny mila hatao.
Namita iraka teto Madagasikara izy ireo, ny 3 hatramin’ny 12 mey teo, mikasika ny Fampindramam-bola nohamoraina (Fec), andiany fahefatra. Efa nankatoavina ny marsa 2021 ity famatsiam-bola ity, fa miandry ny fankatoavana farany avy amin’ny filankevi-pitantanan’ny FMI amin’ny volana jona ho avy izao. Raha tanteraka izany, mitentina 24,44 tapitrisa DTS (32 tapitrisa dolara) izany Fec 4 izany.
Ho 4% ny fitomboan-karena
Haharitra 40 volana ny fampiasana ity vola ity, hoentin’ ny fanjakana malagasy hanamafisana ny toekarena marin-toerana sy hampihenana ny fahantrana. Araka ny tombana napetraka, tokony tsy hihetsika manodidina ny 4% ny fitombon’ny harin-karena faobe amin’ity taona 2023 ity, toy ny tamin’ny taona 2022, raha 5,7% ny taona 2021. Satria hita ny sakana vokatry ny toetr’andro, olana sedrain’ny seha-pihariana lavanila, ny krizy ara-toekarena iraisam-pirenena. Eo koa ny fitotongan’ny sandam-bola Ariary, vokatry ny fidangan’ny vidim-piainana, nanomboka ny taona 2022.
Hamafisina ny ezaka
Araka ny tatitr’ireto delegasion’ny FMI ireto ihany, tratran’ny fanjakana malagasy ny telo tamin’ny dimy amin’ ny tanjona mikasika ny fitantanana ny toekarena ankapobeny. Na izany aza, misy ny ezaka tokony hohatsaraina. Satria kely ny haba azon’ny fanjakana tamin’ny solika. Tokony hihatsara izany amin’ ity taona ity satria efa nisy ny fifanarahana tamin’ny mpandraharaha, tamin’ny desambra 2022. Nihatsara koa ny fanarenana ny rafi -panjakana amin’ny fampiasam-bola, satria notohanan’ny teknisian’ ny FMI. Novaina ny lalàna lasitra mikasika ny tsenambaro-panjakana. Notanterahin’ ny fanjakana koa ny fanavaozana ny lalàna mifehy ny harena an-kibon’ny tany, araka ny toromariky ny Banky Iraisam-pirenena sy ny FMI.
Hiovaova ny vidin-tsolika amin’ny 2024
Anisan’ny andrasan’ireto mpamatsy vola iraisam-pirenena ireto ny hanaovana laharam-pahamehana ny fanarenana ny Jirama. Ao anatin’izany ny hampihenan’ny fanjakana ny fanampiana ara-bola azy. Mila manaraka ny fiovaovan’ny vidin-tsolika eo amin’ny tsena iraisam-pirenena ny eto amintsika manomboka amin’ny telo volana voalohany ny taona 2024.
Njaka A.
French