Nifarana hatreo ny asa ratsin-dRa Nationale na i Dadandry, anisan’ireo jiolahy raindahiny amin’
ny fanafihana mitam-piadiana eto an-dRenivohitra, afakomaly alina.
Tratra tetsy 67 ha, nifanenjehan’ny polisy ny jiolahy raindahiny iray, ny alin’ny alatsinainy hifoha omaly talata. Nitondra fitaovam-piadiana mahery vaika, tsy nanaiky io jiolahy io rehefa nifanehatra tamin’ny polisy nanao fanamiana sivily. Nandositra ary nanapoaka ny basy teny am-pelatanany . Raikitra ny fifanenjehana, voatifitra nandritra izany ity jiolahy atao hoe Ra Nationale ity. Teo am-pikasana hanao ny asa ratsiny izy izao tratra izao. Nandositra avokoa ireo namany rehefa nahita azy nitsirara tamin’ny tany. Latsaka teny aminy ny basy mahery vaika “PA”.
Mpamerin-keloka
Efa mpamerin-keloka hatry ny ela, nokarohina hatrany ity jiolahy ity. Anisan’ny fanaovany ny asa ratsiny ny teny amin’ny manodidina ny 67 ha, Cenam hatreny Ankasina. Niafara tamin’ny fahafatesany ny fandrobana miharo vono olona nataon’ity jiolahy ity. Raha tsiahivina, vao ny faran’ ny herinandro teo, nisy zandary maty voatifitry ny jiolahy teo Ankasina. Voaroba tamin’izany ny lelavola mitetina 15 tapitrisa Ar. Telo lahy ireo olon-dratsy ary nitondra fitaovam-piadiana. Ankoatr’io, maty voatifitry ny polisy koa ny jiolahy iray raindahiny amin’ny fanendahana tetsy Antohomadinika, afakomaly maraina tamin’ny 5 ora sy sasany . Nitondra antsy lava ary teo am-pikasana hanao ny asa ratsiny koa ity farany no lavo.
Tsiferana R.
French