Lalao miisa 3 no natrehin’ny ekipa malagasy Ankoay, ho fanomanana ny fiadiana ny amboara eran-tany, taranja basikety 3×3, ny faran’ny herinandro teo. Izany hoe, “tournoi” iray hifandonana amin’ireo ekipa Pro Senior, ao Serbie, ity lalao ity. Mafy ireo ekipa nifanandrina tamin’ny ekipa malagasy, araka ny nambaran’ny mpanazatra saingy niezaka nanohitra ny Malagasy. Fandresena iray nanoloana ny KV 3×3 Serbie, tamin’ny isa 22 no ho 14, ny azon’ny Ankoay. Lavon’ny 3×3 Ak Sekulic, tamin’ny isa 21 no ho 19, kosa avy eo ry Elly sy ny namany, tamin’ny lalao faharoa ary nihintsana teo amin’ny ampahefa-dalana nanoloana ny Krupanj 3×3 ny Ankoay, izay resy tamin’ny isa 21 no ho 16. Tsiahivina fa io ekipa nihaona tamin’ny Ankoay teo amin’ny ampahefa-dalana io no nahazo ny amboara tamin’ity “tournoi” ity.
Mbola hihamafy hatrany ny fanomanan-tenan’izy 4 mirahalahy amin’izao andro vitsy tsy hanombohan’ny “World Cup 3×3” izao. Mbola hisy ny “tournoi” ny 27 mey izao. Ny 28 mey kosa izy ireo no hihazo an’i Viennes, Autriche, hiatrika ny fiadiana ny amboara eran-tany, hatao ny 30 mey hatramin’ny 4 jona izao.
Mi.Raz
French