Teny no namoronana izao tontolo izao ! Famerimberin’ ny mpikaroka maro io. Misongadina noho ny fananany hasina lehibe kosa anefa ny teny malagasy. Noho io hasina io, vitsy dia vitsy ny Malagasy no sahy niteniteny foana. Sarotra ho an’ny Malagasy ny nanompa na nanozona na nandatsa. Nanome anatra ho an’izay nandia lalan-diso no nezahiny natao.
Niova izany taty aoriana. Niha maivana sy very hasina ny teny malagasy satria na ny hevitra fonosin’izy ireny aza tsy hain’ny tompony akory. « Mandoa latsakemboka », hono ! Firy amin’ny Malagasy, ohatra, no mahafantatra ny atao hoe « latsakemboka » ? Amin’ny fotoana tahaka inona izany no atao ? Inona ny antony hanaovana « latsakemboka » fahiny ? Maro ireo fanontaniana tahaka izany no tsy voavaly intsony ankehitriny.
Lasan-ko vavany…
Manana ireo kanto ahafahana mitazona sy mamelona ary mampita ny hasin’ny teny malagasy ny Malagasy tompony. Anisan’izany ny mpikabary, ny mpihiragasy, ireo mpihira isan-tsokajiny, Matoa tsy mitsaha-mivarina tahaka izao ny lanja aman-kasin’ny teny malagasy, tsy mbola mahavita ny adidiny ireo izay mampiasa ireny kanto ireny. Sa ve efa manao izay ho afany ihany fa tsy misy mpihaino ?
HaRy Razafindrakoto
French