Nanomboka ny zoma 26 mey teo, ny fanarenana ny ampahany amin’ny lalam-pirenena faharoa (RN 2). Mirefy 30 km ity andiany voalohany ity, izay anisan’ny tena ratsy, eo Manjakandriana (PK 48+720) hatreny Anjiro (PK 78+100), miampy ny tetezana eo amin’ny PK 117.
Efa eny an-toerana ny fitaovana vaventy ampiasain’ny orinasa CHEC. Nohazavain’ny minisitry ny Asa vaventy, ny kolonely Andrianatrehina Livah, fa tafiditra ao anatin’ny tetikasa CERC ny asa, iarahana amin’ny Banky Iraisam-pirenena. Amin’ny alalan’ny tetikasa PDDR kosa ny hanarenana ny ampahany hafa amin’ny lalam-pirenena RN 2.
Hentitra ny minisitra, nilazany fa manana ny fenitra takiana ny fanjakana, izay efa voarakitra ao anatin’ny bokinandraikitra.
Noho ny lanjan’ny RN 2, misy ny fandaminana manokana hotohizan’ny fifamoivoizana tsy tapaka. Miara-miasa manatanteraka izany ny minisiteran’ny Asa Vaventy, ny orinasa manao ny asa, ny mpitandro filaminana, handaminana ny fivezivezena sy ny fiarovana ny ain’ny mpampiasa lalana.
Njaka A.
French