Raha oharina amin’ny asa soratra hafa, vitsy kokoa ireo mpanoratra mirotsaka amin’ny fanoratana tantara foronina. Ho fanarenana izany, sady famohazana talenta, hanatanteraka atrikasa ny Havàtsa-Upem.
Volana jona, iray volana hanandratana ny teny malagasy, ho an’ny fikambanan’ny poety sy ny mpanoratra malagasy na ny Havàtsa-Upem. Hanatanteraka atrikasa momba ny tantara foronina izy ireo mandritra io volana io. Isaky ny sabotsy (3 – 10 – 17 ary ny 24 jona), samy manomboka amin’ny 9 ora sy sasany maraina, ao amin’ny foiben-toeran’ny Havàtsa-Upem, Tahala Rarihasina Analakely, rihana I.
Hitarika ny atrikasa amin’ireo fotoana ireo, Ratrema William, mpampianatra mpikaroka manampahaizana manokana momba ny fanadihadiana tantara foronina, mpikambana mahefa ao amin’ny Akademia Malagasy. Ranjatohery Harilala, mpampianatra mpikaroka, mpanoratra tantara foronina, mpikambana mahefa ao amin’ny Akademia Malagasy sady mpikambana ao amin’ny Havàtsa-Upem. Fanja Razafimamonjy, mpikaroka, mpanoratra efa nahazo loka maro tamin’ny fifaninanana manoratra tantara foronina.
Sarotra kokoa ny manoratra tantara foronina
Eo amin’ny tontolon’ny soratra, mandia fotoan-tsarotra ny famoronana tantara foronina, ankehitriny. Miha vitsy ireo mirotsaka amin’ny fanoratana azy ity. Anisan’ny antony mahatonga izany ny somary fahasarotana kokoa hita ao aminy raha oharina amina asa soratra hafa tahaka ny tononkalo, raha ny fanazavan’i Eric Ravalisoa, mpanoratra tantara foronina efa nahazo loka maro tamin’ny asa sorany.
« Tsy mitovy loatra amin’ny famoronana tononkalo ny tantara foronina satria mitombo rehefa mety ho fandaniana ao aminy », hoy i Eric Ravalisoa. Mandany fotoana kokoa satria maharitra vao voasoratra, ny tantara foronina. Mety handany vola ihany koa satria mila mahita ilay toerana vao afaka mamorona tantara mifandraika amin’izany. Raha hanoratra tantara foronina miainga amin’ny zava-misy any Toamasina isika, tsy maintsy mahita ny any Toamasina fa tsy azo atao ny maminavina fotsiny, sns.
Ireny rehetra ireny no mety mampihena ny isan’ny mpanoratra tantara foronina, raha ny fandinihan’i Eric Ravalisoa ny zava-misy ankehitriny. Noho izany, ilaina ny atrikasa tahaka izao hamohazana ireo talenta miafina any ho any.
HaRy Razafindrakoto
French