Norombahin-dRamatoa Rabarinirinarison Rindra Hasimbelo, minisitry ny Toekarena sy ny Fitantanambola ny amboaran’ny « Minisitry ny Toekarena », nokarakarain’ny African Business Leadership Awards 2023. Miisa efatra ny firenena Afrikanina voasivana nanana solontena tamin’ity fifaninanana ity, ary ny teo anivon’ny kaontinanta Afrikanina manontolo no namaritra sy nifidy izay ho mpandresy. Anisan’izany ny minisitry ny Fitantanambola any Egypta, Mohamed Maait, ny minisitry ny Fitantanambola sy ny fampandrosoana ny toekarena any Zimbabwe, Mthuli Ncube, ny minisitry ny Fitantanambola sy ny drafitra fampandrosoana ny toekarena any Maorisy ary ny minisitra malagasy Rabarinirinarison Rindra Hasimbelo.
Mitondra avo ny fahaiza-mitantana eto amintsika eo imason’i Afrika sy maneran-tany, ny fahazoana amboara sy ny fankasitrahana toy izao.
Nitatitra ny zava-bita
Ankoatra izany, nihaona tamin’ny solombavambahoaka ny minisitra Rabarinirinarison Rindra, omaly. Notateriny ny zava-bitan’ny minisitera nandritra ny taona 2022 sy ny drafitrasa ho an’ny dimy volana voalohany ho an’ny taona 2023. Lohahevitra efatra no niankinan’ny tatitra nataony. Voalohany, ny fitantanambolam-panjakana amin’ny ankapobeny. Faharoa, ny tamberin’andraikitra. Fahatelo, ny fampivoarana ara-toekarena sy sosialy. Fahefatra, ny fanavaozana ny lalàna sy ny didim-panjakana mikasika ny fitantanambolam-panjakana.
Njaka A.
French