Hotanterahina ny talata 13 jona izao any an-drenivohitry ny faritra Sofia, ny fitsarana ilay lozam-pifamoivoizana nitranga ny 20 novambra 2022, tany Ambendrana. Namoy ny ainy ny raim-pianakaviana, nodomina fiaram-panjakana, nentina tale iray miasa any an-toerana.
Nambaran’ireo fianakavian’ny maty fa manantena sy miandrandra fitsarana madio sy araka ny rariny ary mangarahara ny vahoaka any Antsohihy.
Efa namoahan’ny fitsarana fanapahan-kevitra fampidirana am-ponja vonjimaika ilay tomponandraikitra ambony eo anivon’ny faritra Sofia, ahiana ho nahavanon-doza. “Mampanahy anay anefa fa mety nisehoana kolikoly ny raharaha satria nivoaka ny fonja izy iray andro sy tapany, taorian’ny fanapahan-kevitry ny fitsarana”, hoy izy ireo. Nanterin’ireo fianakaviana fa efa nikasa ny hitroatra ny mponina any an-toerana mahalala ity raharaha ity rehefa naheno izany.
Etsy andaniny, maro ireo nijoro vavolombelona nilaza ho nahita maso ny tranga niseho tamin’ny nandonan’ny fiara ilay olona ka nahafaty azy. “Nandositra avy hatrany izy taorian’izany… Manaratsy endrika ny fitsarana sy ny fanjakana aty an-toerana ny tahaka izao. Misy hatrany ny ambonin’ny lalàna sy manao tsindrihazolena ny hafa”, hoy ihany ny fianakaviana.
Tsiahivina fa mbola giazana eny amin’ny fitsarana hatramin’izao ilay fiaram-panjakana “Plaque rouge” sy fiara iray nentin’izy ireo nisotrosotro tany Ambendrana sy Anjingo ka nahatonga ny loza.
Synèse R.
French